Madaxweyne;Siilaanyo Oo Xilkii Ka Qaaday Guddoomiyihii Gobolka Maroodi Jeex.

Hargaysa(FMN)—War-Saxaafadeed ka soo baxay Xafiiska Madaxtooyada Somaliland ayaa lagu Sheegay In Madaxweynaha Jamhuuriyada Lamagac baxday Somaliland Mudane;Axmed Maaxamed Maxamuud(Siilaanyo) uu digreeto madaxweyne Xilkii kaga qaaday Gudoomiyihii Gobolka Maroodi Jeex Mudane;Mustafe Cabdi Ciise (Mustafe Shiine).

War-Saxaafadeed ay soo saartay madaxtooyada Somaliland oo nuqul kamid ah ay heshay Shabakada Warbaahinta ee Feer-feer Media Network(FMN)ayaa uqornaay Sidan Soo Socota:-


WAR-SAXAAFADEED: 26/10/2017
Madaxweynaha Jamhuuriyadda Somaliland, Mudane Axmed Maxamed Silaanyo, waxa uu maanta wareegto madaxweyne oo summadeedu tahay JSL/M/XILQ/249/1-5169/102017 uu xilka qaadis iyo magacaabid ku sameeyey Guddoomiyaha Gobolka Maroodi-jeex.

Xilka Qaadis

Ku: Mudane, Mustafe Cabdi Ciise (Mustafe Shiine),
Guddoomiyihii Hore ee Gobolka Maroodi-jeex Hargeysa

Og: Wasiirka Wasaaradda Arrimaha Gudaha Hargeysa

Ujeeddo: Xil-ka Qaadis

Mudane,

Waxaan aad kuugu mahadinayaa muddadii aynu wada shaqaynaynay. Xilalka Qaranka ayey dabcigeed tahay in ay meerto noqoto oo kolba cid hanan karta loo dhiibo.

Sidaa darteed, waxaan gartay in aan kaa qaado xilka Guddoomiyaha Gobolka Maroodi-jeex ee Jamhuuriyadda Somaliland.

Haddaba, waxaan kaa rajaynayaa in si niyad sami ah aad ugu wareejiso xilka aad haysay Mudane, Boos Mire Maxamed, oo aan xilka Guddoomiyaha Gobolka Maroodi-jeex ee Jamhuuriyadda Somaliland u magacaabay.

Sidoo kale, waxaan Wasiirka Wasaaradda Arrimaha Gudaha, oo ay warqadani ogaysiin ugu socoto, farayaa in uu labada masuul u kala wareejiyo xilka Guddoomiyaha Gobolka Maroodi-jeex.

Madaxweynuhu:-

Markuu Arkay: Qodobka 90aad ee Dastuurka Jamhuuriyadda Somaliland;

Markuu Arkay: Qodobka 110aad ee Dastuurka Jamhuuriyadda Somaliland;

Markuu Tixgeliyey: Ahmiyadda ay Guddoomiyeyaasha Gobolladu u leeyihiin Dhismaha Qaranka;

Markuu Aqoonsaday: In baahi loo qabo buuxinta jagada Guddoomiyaha Gobolka Maroodi-jeex ee Jamhuuriyadda Somaliland;

Markuu Ka Fiirsaday: Kartidiisa, aqoontiisa iyo hufnaantiisa shaqo;

Markuu Ku Qancay: In uu hanan karo xilkan loo magacaabay;

Wuxuu go’aansaday

In Mudane, Boos Mire Maxamed, laga bilaabo taariikhda maanta uu ahaado Guddoomiyaha Gobolka Maroodi-jeex ee Jamhuuriyadda Somaliland.

ALLAA MAHAD LEH
Xuseen Aadan Cige (Deyr)
Af-hayeenka Madaxtooyada JSL

Leave a Reply